Biblia Takatifu

¹Siku ya tatu kulikuwa na arusi katika mji wa Kana ya Galilaya, naye mama yake Yesu alikuwepo pale.

²Yesu pamoja na wanafunzi wake walikuwa wamealikwa arusini pia.

³Divai ilipokwisha, mama yake Yesu akamwambia, “Wameishiwa na divai.”

⁴Yesu akamwambia,“Mwanamke, nina nini nawe? Saa yangu haijawadia.”

⁵Mama yake akawaambia wale watumishi, “Lolote atakalowaambia, fanyeni.”

⁶Basi ilikuwepo mitungi sita ya kuhifadhia maji iliyotengenezwa kwa mawe kwa ajili ya kujitakasa kwa desturi ya Kiyahudi; kila mtungi ungeweza kuchukua vipipa viwili au vitatu.^*

⁷Yesu akawaambia wale watumishi,“Ijazeni hiyo mitungi maji.”Nao wakaijaza ile mitungi mpaka juu.

⁸Kisha akawaambia,“Sasa choteni hayo maji kidogo, mpelekeeni mkuu wa meza.”Hivyo wakachota, wakampelekea.

⁹Yule mkuu wa meza akayaonja yale maji ambayo yalikuwa yamebadilika kuwa divai. Hakujua divai hiyo ilikotoka ingawa wale watumishi waliochota yale maji wao walifahamu. Basi akamwita bwana arusi kando

¹⁰akamwambia, “Watu wote hutoa kwanza divai nzuri, kisha huleta ile divai hafifu wageni wakisha kunywa vya kutosha, lakini wewe umeiweka ile nzuri kupita zote mpaka sasa.”

¹¹Huu, ndio uliokuwa muujiza wa kwanza Yesu aliofanya Kana ya Galilaya. Hivyo Yesu alidhihirisha utukufu wake, nao wanafunzi wake wakamwamini.

¹²Baada ya hayo, Yesu pamoja na mama yake, ndugu zake na wanafunzi wake, walishuka mpaka Kapernaumu, wakakaa huko siku chache.

¹³Ilipokaribia wakati wa Pasaka ya Wayahudi, Yesu alipanda kwenda Yerusalemu.

¹⁴Huko Hekaluni aliwakuta watu wakiuza ngʼombe, kondoo na njiwa, nao wengine walikuwa wameketi mezani wakibadili fedha.

¹⁵Akatengeneza mjeledi kutokana na kamba, akawafukuza wote kutoka kwenye eneo la Hekalu, pamoja na kondoo na ngʼombe. Akazipindua meza za wale wabadili fedha na kuzimwaga fedha zao.

¹⁶Akawaambia wale waliokuwa wakiuza njiwa,“Waondoeni hapa! Mnathubutuje kuifanya nyumba ya Baba yangu kuwa mahali pa biashara?”

¹⁷Wanafunzi wake wakakumbuka kuwa imeandikwa: “Wivu wa nyumba yako utanila.”

¹⁸Ndipo Wayahudi wakamuuliza, “Unaweza kutuonyesha ishara gani ili kuthibitisha mamlaka uliyo nayo ya kufanya mambo haya?”

¹⁹Yesu akawajibu,“Libomoeni hili Hekalu, nami nitalijenga tena kwa siku tatu!”

²⁰Wale Wayahudi wakamjibu, “Hekalu hili lilijengwa kwa muda wa miaka arobaini na sita, nawe wasema utalijenga kwa siku tatu?”

²¹Lakini yeye Hekalu alilozungumzia ni mwili wake.

²²Baada ya kufufuliwa kutoka kwa wafu, wanafunzi wake wakakumbuka yale aliyokuwa amesema. Ndipo wakayaamini Maandiko na yale maneno Yesu aliyokuwa amesema.

²³Ikawa Yesu alipokuwa Yerusalemu kwenye Sikukuu ya Pasaka, watu wengi waliona ishara na miujiza aliyokuwa akifanya, wakaamini katika jina lake.

²⁴Lakini Yesu hakujiaminisha kwao kwa sababu aliwajua wanadamu wote.

²⁵Hakuhitaji ushuhuda wa mtu yeyote kuhusu mtu, kwa kuwa alijua yote yaliyokuwa moyoni mwa mtu.