Biblia Takatifu

¹Yesu aliposhuka kutoka mlimani, makutano makubwa ya watu yakamfuata.

²Mtu mmoja mwenye ukoma akaja na kupiga magoti mbele yake, akasema, “Bwana, kama ukitaka, unaweza kunitakasa.”

³Yesu akanyoosha mkono wake akamgusa yule mtu, akamwambia,“Nataka. Takasika!”Mara yule mtu akatakasika ukoma wake.

⁴Kisha Yesu akamwambia,“Hakikisha humwambii mtu yeyote. Lakini nenda ukajionyeshe kwa kuhani, na utoe sadaka aliyoamuru Mose, ili kuwa ushuhuda kwao.”

⁵Yesu alipoingia Kapernaumu, jemadari mmoja alimjia, kumwomba msaada,

⁶akisema, “Bwana, mtumishi wangu amelala nyumbani na amepooza, tena ana maumivu makali ya kutisha.”

⁷Yesu akamwambia,“Nitakuja na kumponya.”

⁸Lakini yule jemadari akamwambia, “Bwana, mimi sistahili wewe kuingia chini ya dari yangu. Lakini sema neno tu, naye mtumishi wangu atapona.

⁹Kwa kuwa mimi mwenyewe ni mtu niliyewekwa chini ya mamlaka, nikiwa na askari chini yangu. Nikimwambia huyu, ‘Nenda,’ yeye huenda; na mwingine nikimwambia, ‘Njoo,’ yeye huja. Nikimwambia mtumishi wangu, ‘Fanya hivi,’ yeye hufanya.”

¹⁰Yesu aliposikia maneno haya, alishangaa, akawaambia wale waliomfuata,“Amin, nawaambia, hata katika Israeli sijapata kuona yeyote mwenye imani kubwa namna hii.

¹¹Ninawaambia kwamba wengi watatoka mashariki na magharibi, nao wataketi karamuni pamoja na Abrahamu, Isaki na Yakobo katika Ufalme wa Mbinguni.

¹²Lakini warithi wa Ufalme watatupwa katika giza la nje, ambako kutakuwako kilio na kusaga meno.”

¹³Kisha Yesu akamwambia yule jemadari,“Nenda na iwe kwako sawasawa na imani yako.”Naye yule mtumishi akapona saa ile ile.

¹⁴Yesu alipoingia nyumbani kwa Petro, alimkuta mama mkwe wa Petro amelala kitandani, akiwa ana homa.

¹⁵Akamgusa mkono wake na homa ikamwacha, naye akainuka na kuanza kumhudumia.

¹⁶Jioni ile, wakamletea watu wengi waliopagawa na pepo wachafu, naye akawatoa wale pepo wachafu kwa neno lake, na kuwaponya wagonjwa wote.

¹⁷Haya yalifanyika ili litimie lile lililonenwa kwa kinywa cha nabii Isaya kwamba:“Mwenyewe alitwaa udhaifu wetuna alichukua magonjwa yetu.”

¹⁸Yesu alipoona makutano mengi wamemzunguka, aliwaamuru wanafunzi wake wavuke mpaka ngʼambo ya ziwa.

¹⁹Kisha mwalimu mmoja wa sheria akamjia Yesu na kumwambia, “Mwalimu, nitakufuata kokote uendako.”

²⁰Naye Yesu akamjibu,“Mbweha wana mapango, nao ndege wa angani wana viota, lakini Mwana wa Adamu hana mahali pa kulaza kichwa chake.”

²¹Mwanafunzi mwingine akamwambia, “Bwana, niruhusu kwanza nikamzike baba yangu.”

²²Lakini Yesu akamwambia,“Nifuate, uwaache wafu wawazike wafu wao.”

²³Naye alipoingia kwenye mashua, wanafunzi wake wakamfuata.

²⁴Ghafula, kukainuka dhoruba kali baharini hata mashua ikaanza kufunikwa na mawimbi, lakini Yesu alikuwa amelala usingizi.

²⁵Wanafunzi wake wakamwendea na kumwamsha, wakisema, “Bwana, tuokoe! Tunazama!”

²⁶Naye Yesu akawaambia,“Kwa nini mnaogopa, enyi wa imani haba?”Kisha akaamka na kukemea dhoruba na mawimbi, nako kukawa shwari kabisa.

²⁷Wale watu wakashangaa, wakisema, “Ni mtu wa namna gani huyu? Hata upepo na mawimbi vinamtii!”

²⁸Walipofika ngʼambo katika nchi ya Wagerasi, watu wawili waliopagawa na pepo wachafu walitoka makaburini nao wakakutana naye. Watu hawa walikuwa wakali mno kiasi kwamba hakuna mtu aliyeweza kupita njia ile.

²⁹Wakapiga kelele, “Una nini nasi, Mwana wa Mungu? Umekuja hapa kututesa kabla ya wakati ulioamriwa?”

³⁰Mbali kidogo kutoka pale walipokuwa, kulikuwa na kundi kubwa la nguruwe wakilisha.

³¹Wale pepo wachafu wakamsihi Yesu, “Ukitutoa humu, turuhusu twende kwenye lile kundi la nguruwe.”

³²Akawaambia,“Nendeni!”Hivyo wakatoka na kuwaingia wale nguruwe, nalo kundi lote likateremka gengeni kwa kasi, likaingia katika ziwa na kufa ndani ya maji.

³³Wale watu waliokuwa wakiwachunga hao nguruwe wakakimbia wakaingia mjini, wakaeleza yote kuhusu yale yaliyowatokea wale waliokuwa wamepagawa na pepo wachafu.

³⁴Kisha watu wote wa mji huo wakatoka kwenda kukutana na Yesu. Nao walipomwona wakamsihi aondoke kwenye nchi yao.